النشرة الأسبوعية: من 20 يونيو وحتى 25 يونيو ٢٠٢٠

0

أهلًا بيكم، فريق الجبهة بيجمع كل اللي يقدر يوصل له طول الأسبوع، عن إيه اللي حصل في المحاكم والنيابات، ويتابع أحوال الناس اللي بيتقبض عليها ويشوف ليه وإزاي اتقبض عليهم.

القبض : 

يوم 20 يونيو، أتم الناشط محمد عادل سنتين كاملين من الحبس الاحتياطي على ذمة القضية 5606 لسنة 2018 إداري أجا، وده بعد ما اتقبض عليه يوم ١٩ يونيو ٢٠١٨،  من قسم شرطة أجا بمحافظة الدقهلية  الساعة 6 الصبح بعد ما خلص مراقبته اليومية على ذمة قضية تانية. وده بسبب بلاغ قدمه أحد المواطنين بيقول فيه إن محمد عادل بيكتب منشورات تستهدف استقرار الدولة المصرية على صفحته على موقع فيسبوك. والقانون بيقول بما إن سنتين مروا من الحبس الاحتياطي، فمحمد عادل المفروض يكون في بيته دلوقت، لكنه لسه في سجن المنصورة.

يوم 23 يونيو، وأثناء توجه سناء سيف أخت الناشط والمدون علاء عبد الفتاح مع والدتها الدكتورة ليلي سويف وأختها منى سيف لمكتب النائب العام عشان يبلغوا في حادثة الاعتداء عليهم من مجموعة من السيدات قدام مجمع سجون طرة ، اتفجأت بمجموعة من الأشخاص بزي مدني بيقوموا بوضعها في عربية ميكروباص، وبعد ساعات ظهرت في نيابة أمن الدولة في التجمع وتم التحقيق معها على ذمة القضية رقم 659 لسنة 2020 حصر أمن دولة واتهموها  بالترويج والتحريض على ارتكاب جريمة إرهابية، ونشر وإذاعة أخبار كاذبة، وتكدير الأمن العام، وإساءة استخدام وسائل التواصل الاجتماعي، واستخدام موقع من مواقع التواصل الاجتماعي بغرض الترويج لأفكار داعية لارتكاب أعمال إرهابية، وأمرت النيابة بحبسها 15 يوم على ذمة التحقيق، وتم ترحيل سناء لسجن القناطر.

يوم 24 يونيو: اقتحمت قوات من الشرطة-  بتقول إنها  من مباحث المصنفات – مقر الموقع الصحفي ” المنصة” وقبضت علي رئيسة التحرير نورا يونس، وتاني يوم تم عرضها على نيابة المعادي وحققت معاها في القضية رقم  9455/2020 جنح المعادي ووجهت لها عدد من الاتهامات منها إنشاء حساب على شبكة معلوماتية يهدف إلى ارتكاب وتسهيل ارتكاب جريمة معاقب عليها قانونًا. ومهم نقول إن موقع المنصة تقدم بأوراق الترخيص اللازمة وسدد ٥٠ ألف جنيه رسوم في شهر أكتوبر ٢٠١٨، ولحد دلوقت لم يتم البت في طلب الترخيص.

النيابة أخلت سبيل نورا بعد احتجاز دام أكتر من 30 ساعة بكفالة 10 آلاف جنيه ومن المعروف إن موقع المنصة اتحجب من شهر يونيو 2017 من غير حكم قضائي ولا إعلان عن الجهة اللي قامت بالحجب. 

تحقيقات النيابة وجلسات تجديد الحبس :

يوم 20 يونيو ظهر أحمد جابر شعبان بعد اختفاؤه قسريا لمدة 6 ايام، وظهر معاه محمد جمال محمد بعد اختفائه قسريًا لمدة 8 أيام، بعد ما اتقبض عليهم من منازلهم بمحافظة قنا، واتحقق معاهم هم الاتنين قدام نيابة أمن الدولة العليا واتحطوا على ذمة نفس القضية 535 لسنة 2020 واتوجه لهم تهم  بمشاركة جماعة إرهابية وإساءة استخدام وسائل التواصل الاجتماعي.

الجنايات :

  • الدائرة الأولى من دوائر الإرهاب برئاسة المستشار محمد شرين فهمي انعقدت يوم 20 يونيو 2020 عشان تنظر في أمر حبس 136 متهم على ذمة 23 قضية من قضايا الإرهاب، وقررت الدائرة حبس كل المتهمين على ذمة القضية 277 لسنة 2019 لمدة اسبوعين، وقررت حبس باقي المتهمين في 22 قضية لمدة 45 يوم ، وقرار الحبس صدر رغم عدم حضور المتهمين .

  • وفي نفس اليوم انعقدت الدائرة الخامسة من دوائر الارهاب برئاسة المستشار محمد سعيد الشربيني، عشان تنظر في أمر حبس 170 متهم على ذمة 22 قضية من قضايا الإرهاب، وقررت المحكمة تأجيل قرار الحبس للمتهمين في القضايا 1739 و 1413 و 1480 و 1358 لمدة أسبوعين، وقررت حبس باقي المتهمين 45 يوم، ودا حصل بردو من غير تواجد المتهمين قدام القاضي. 

  • وفي يوم 23 يونيو انعقدت الدائرة الخامسة من دوائر الإرهاب واللي بيرأسها المستشار محمد سعيد الشربيني عشان تنظر في أمر حبس 273 متهم على ذمة 45 قضية من قضايا الإرهاب، وقررت في غياب المتهمين تأجيل قرار الحبس في عدد من القضايا وهم (  750 و 1530 و 1898 و 930 و 58 و 441 و 1956 و 1269 و 1118 و 1739 و 1475 و 1465 و 1360 و 1175) وقررت حبس باقي المتهمين لمدة 45 يوم.

أحكام:

يوم 23 يونيو، محكمة جنح مستأنف اقتصادية الإسكندرية أيدت حكم بحبس الناشط والمدون أنس حسن لمدة 3 سنوات وتغريمه 300 ألف جنية، ورفضت الاستئناف المقدم من محامي أنس علي الحكم، وده حصل بعد اتهامه بالإساءة للأديان وإساءة استخدام مواقع التواصل الاجتماعي. 

Leave A Reply