من ١٨ يوليو إلي ٢٣ يوليو ٢٠٢٠

0

أهلًا بيكم، فريق الجبهة بيجمع كل اللي يقدر يوصل له طول الأسبوع، عن إيه اللي حصل في المحاكم والنيابات، ويتابع أحوال الناس اللي بيتقبض عليها ويشوف ليه وإزاي اتقبض عليهم.

النيابة العامة (تحقيقات وجلسات تجديد الحبس وبيانات) :

  • يوم 20 يوليو، ظهر نور الدين عيد شاكر قدام نيابة أمن الدولة بعد ما اتقبض عليه من بيته يوم 23 يونيو، واختفى بعدها قسريًا لمدة 27 يوم، النيابة حققت معاه على ذمة القضية 751 لسنة 2020، واتهمته  بالانضمام لجماعة إرهابية رابطة أولتراس زمالك، وقررت حبسه احتياطيًا 15 يوم.

  • في نفس اليوم ظهر أحمد بحار فى نيابة أمن الدولة ، بعد ما اتقبض عليه من بيته يوم 9 يونيو، والنيابة حققت معاه على ذمة القضية751 لسنة 2020 واتهمته بالانضمام إلى جماعة الوايت نايتس، وأمرت بحبسه 15 يوم على ذمة التحقيق.

  • يوم 21 يوليو ظهر على محمد الهوبي قدام نيابة أمن الدولة، واتحقق معاه بتهمة الانضمام لجماعة إرهابية، على ذمة القضية رقم 730 لسنة 2020، علي الهوبي اتدور على ذمة القضية دي بعد ما اخد براءة يوم 9 مارس 2020 في القضية 64 عسكرية، وكان اتقبض عليه من بيته في الفيوم 3 سنين. وبعد البراءة اترحل لمحل إقامته للإفراج عنه لكن بدل ما يروح بيته، اتفاجئ إنه بيتنقل مرة تانية لمقر الأمن الوطني وفضل مختفي هناك 4 شهور لحد ما اتعرض على النيابة اللي حققت معاه وأخلت سبيل بضمان محل إقامته.

  • يوم 24 يوليو ظهر أحمد عبد العظيم الدمليجي قدام نيابة منوف بعد اختفاء قسري استمر أكتر من 3 سنين، أحمد عبد العظيم اتقبض عليه يوم 25 أبريل 2017، ومن ساعتها محدش يعرف عنه حاجة لحد ما ظهر في النيابة.

الجنايات

  • قبل الكلام عن قرارات دوائر الأرهاب، بنوضح إن الأسبوع ده هو أول مرة من 4 شهور ينزل المتهمين لحضور جلسات تجديد حبسهم، بعد ما كان بيتجدد حبسهم على الورق من غير حضورهم، أو بيستمر حبسهم بسبب تأجيل الجلسات لتعذر نقلهم من أماكن احتجازهم.

  • يوم 18 يوليو، انعقدت جلسة لنظر أمر حبس 202 متهم محبوسين على ذمة 37 قضية، ولأول مرة من ساعة ما الحكومة بدأت إجراءاتها الاحترازية لمواجهة فيروس الكورونا من 4 شهور، المتهمين اتنقلوا من أماكن احتجازهم لحضور الجلسات، وفي اليوم ده الدائرة الأولى برئاسة المستشار طارق محمد محمود أخلت سبيل عدد من المتهمين على ذمة 4 قضايا ونيابة أمن الدولة لم تستأنف. وفي 3 قضايا تانيين اتأجل النظر في أمر المتهمين على ذمتها ليوم 27 يوليو بسبب إن المتهمين لم يحضروا من محبسهم في المؤسسة العقابية للأحداث بالمرج وسجن الكيلو عشرة ونص.

  • ويوم 19 يوليو  انعقدت نفس الدائرة بنظر أمر حبس 197 متهم على ذمة 8 قضايا، وصدر قرار بإخلاء سبيل عدد منهم في 6 قضايا

  • يوم 20 يوليو انعقدت الدائرة الأولى للمرة التالتة في نفس الأسبوع لكن المرة دي برائسة المستشار حسين السايس، لنظر أمر حبس 353 متهم على ذمة 12 قضية، وصدر القرار بتأجيل الجلسة ليوم 10 أغسطس لتعذر حضور المتهمين.

  • يوم 22 يوليو المستشار محمد شيرين فهمي هو اللي كان رئيس الدائرة الأولي، اللي أصدر قرار بمد الحبس الاحتياطي لكل المتهمين المعروضين قدامه وعددهم 10 على ذمة 4 قضايا، لمدة 45 يوم.

السجون 

  • يوم 23 يوليو اتنقل صلاح سلطان لسجن العقرب في زنزانة انفرادية رغم وضعه الصحي الصعب، وكان صلاح سلطان اتنقل من مكان احتجازه في سجن وادي النطرون يوم 15 يونيو، ومحدش كان يعرف مكانه، وكل ده حصل بعد ما ابنه رفع قضية في محكمة أمريكية ضد حازم الببلاوي رئيس الوزراء السابق، بيحمله فيها مسئولية تعذيبه وقت ما كان محتجز في مصر.

.

أحكام

  • يوم 18 يوليو أجلت محكمة القضاء الإداري الدعوى رقم ٢٧٠٩٤ لسنة ٧٤ ق   اللي رفعها المحامين في المركز المصري، لنقل المحامي والبرلماني السابق زياد العليمي، لمستشفى خارجي حكومي أو خاص بسبب وضعه الصحي، مع استعداد أهله لتحمل كل المصاريف طول فترة علاجه. زياد العليمي محبوس في ليمان طرة من 25 يونيو 2019، على ذمة القضية 930 أمن دولة لسنة 2019 والمعروفة باسم قضية تحالف الأمل.

  • في نفس اليوم قررت محكمة جنايات شمال  القاهرة  – الدائرة 30 – عدم قبول التظلم اللي قدمه السنة اللي فاتت 15  فرد بينهم جمال عيد ومزن حسن على منعهم من السفر، المحكمة كمان ألزمتهم بالمصروفات الجنائية، وصادرت الكفالات، المحكمة كمان قررت كمان عدم قبول التظلم اللي قدمته  جمعية نظرة للدراسات النسوية في قرار المنع من التصرف في أموال الجمعية السائلة والمنقولة والعقارية. 

Leave A Reply