من 27 يونيو وحتى يوم  3يوليو 2020 

0

أهلًا بيكم، فريق الجبهة بيجمع كل اللي يقدر يوصل له طول الأسبوع، عن إيه اللي حصل في المحاكم والنيابات، ويتابع أحوال الناس اللي بيتقبض عليها ويشوف ليه وإزاي اتقبض عليهم.

 

النيابة العامة (تحقيقات وجلسات تجديد الحبس وبيانات) :

  • يوم 27 يونيو تم التحقيق مع المدرس بكلية طب الزقازيق وعضو نقابة الأطباء محمد معتز منصور الفوال في نيابة أمن الدولة العليا على ذمة القضية 558 لسنة 2020 ، بعد القبض عليه من منزله بحوالي 36 ساعة، واتهمته النيابة بالانضمام لجماعة إرهابية ونشر وإذاعة أخبار كاذبة وإساءة استخدام وسائل التواصل الاجتماعي، وده كله حصل بعد ما كتب الدكتور محمد الفوال على  صفحته الشخصية على فيس بوك بوست بيطالب فيه رئيس الوزراء بالاعتذار للأطباء، بعد ما اتهمهم بالتقاعس في مواجهة فيروس كورونا.

  • وفي يوم 29 يونيو ظهر  ميسرة صابر محمد عبد العاطي، أخصائي بيع أدوات طبية، بعد ما كان مختفي قسريًا من 9 أيام، قدام نيابة أمن الدولة العليا، واتحقق معاه علي ذمة القضية 535 لسنة 2020 واتهمته النيابة بالانضمام لجماعة إرهابية ونشر وإذاعة أخبار كاذبة وقررت نيابة أمن الدولة حبسه 15 يوم على ذمة التحقيق. 

  • يوم 1 يوليو  قدم اتنين محاميين  للنائب العام ” طلب مناشدة” وطالبوا فيه بإخلاء سبيل الدكتور عبد المنعم أبو الفتوح رئيس حزب مصر القوية بسبب إنه تخطى الحد الأقصى المسموح بيه في القانون للحبس الاحتياطي اللي هو سنتين، ويذكر أن أبو الفتوح محبوس من أكتر من سنتين على ذمة القضية ٤٤٠ لسنة ٢٠١٨ وكمان النيابة حققت معاه علي ذمة قضية تانيه وهي ١٧٨١ لسنة ٢٠١٩ وحبسته على ذمتها لمدة 15 يوم بالرغم من قرارات حبسه على ذمة قضيته الأصلية اللي هي ٤٤٠. كمان عبد المنعم أبو الفتوح بيعاني من مشاكل صحية كتيرة زي الذبحات الصدرية المتكررة. 

  • في نفس اليوم اجتمع النائب العام المصري حمادة الصاوي مع نظيره الإيطالي، وبعد ما هناه بمنصبه الجديد أكد المستشار المصري إن التحقيقات لسه شغاله في مقتل جوليو ريجيني الباحث الإيطالي اللي اتقتل في مصر. بعد 4 سنين لسه السلطات المصرية ما أعلنتش عن الفاعل، وفي بداية 2020 النائب العام أعلن عن تشكيل فريق جديد للتحقيق في القضية. وبنفكركم إن في 5 أفراد مصريين  قتلتهم الشرطة المصرية بدعوى إنهم مسئولين عن قتل ريجيني وبعدين الكلام ده طلع مش صحيح. إيطاليا بعد كده اتهمت 5 من مسئولين أمن مصريين بإنهم السبب في قتل الباحث الإيطالي.

  • يوم 2 يوليو قررت نيابة الدقي حبس صانعة المحتوى على “تيك توك” ريناد عماد أربعة أيام علي ذمة التحقيق واتهمتها ب«تقديم محتوى وفيديوهات خادشة للحياء، تندرج تحت إذاعة مواد إباحية»  وفي نفس اليوم، أمرت نيابة شمال بنها بحبس منار سامي أربعة أيام، واتهمتها ب” تقديم فيديوهات خادشة للحياء العام بقصد ممارسة الدعارة والتحريض على الفسق والفجور”. وبكده بيرتفع عدد المحبوسين على خلفية ملاحقة النيابة لمقدمي المحتويات علي “تيك توك” لـ7 بنات، والبداية كانت مع حنين حسام ومودة الأدهم في شهر أبريل اللي فات. 

  • في نفس اليوم أمرت النيابة العامة بحبس اتنين متهمين احتياطيًا، بعد ما اتهمتهم بسب وضرب وسرقة طفل سوداني ونشرهم عنه على شبكات التواصل الاجتماعي من غير رضاه، وحسب البيان اللي نشرته صفحة النيابة العامة على فيسبوك، “وحدة الرصد والتحليل بإدارة البيان بمكتب النائب العام” رصدت على مواقع التواصل فيديو متداول بين الناس عن اللي حصل للطفل من تنمر واعتداء، وفي البيان أكدت النيابة العامة إنه وصلها عدد من المطالبات على فيسبوك للتحقيق في الواقعة، وبردو أسرة الطفل كانوا قدموا بلاغ للنائب العام يوم 28 يونيو للمطالبة بالتحقيق في واقعة الاعتداء والعنصرية اللي تعرض لها ابنهم.

  • يوم 3 يوليو صدر قرار من نيابة أمن الدولة العليا بإخلاء سبيل الصحفي والنقابي محمد منير، وكان اتقبض علي الأستاذ منير يوم 15 يونيو واتحقق معاه علي ذمة القضية 535 لسنة 2020.

  • وفي آخر الأسبوع ده يوم 3 يوليو أصدرت النيابة العامة بيان بتقول فيه إن وحدة الرصد والتحليل التابعة لمكتب النائب العام، لسه في مرحلة المتابعة لكل الكلام الداير على مواقع التواصل الاجتماعي عن المدعو أحمد بسام ذكي، واللي اتنشرت شهادات من بنات كتير بتقول إنه ” تعدى على عدد من الفتيات بالقول والفعل .. وإكراههن على ممارسات منافية للآداب بالتهديد والإكراه”. كلام كتير على السوشيال ميديا بيقول إن أحمد بسام ذكي تحرش واغتصب وهدد بنات كتير ممكن يوصل عددهم لـ 100 من بينهم أطفال. بيان النيابة العامة بيقول إن لسه مفيش حد قدم بلاغ في أحمد بسام ذكي غير بنت واحدة من خلال الرابط الإلكتروني لتقديم الشكاوى للنيابة العامة.

 

محكمة الجنايات :

  • يوم 28 يونيو انعقدت الدائرة 1 من دوائر الإرهاب برئاسة المستشار محمد شرين فهمي عشان تنظر في أمر حبس 189 متهمين في 38 قضية من قضايا الإرهاب، وأجل المستشار محمد شرين فهمي النظر في أمر كل المتهمين لجلسة 12 يوليو لتعذر حضور أي حد منهم من مكان احتجازه. 

  • يوم 30 يونيو محكمة جنايات المنصورة جددت حبس الناشط السياسي وعضو حركة 6 ابريل محمد عادل لمدة 45 يوم جديدة، رغم انتهاء المدة القانونية لحبسه احتياطيًا.

  • ويوم 1 يوليو انعقدت الدائرة 1 مرة تانية عشان تنظر في أمر حبس 167 محبوسين علي ذمة 24 قضية من قضايا الإرهاب، وبردو أجل المستشار شرين فهمي النظر في أمر حبس كل المتهمين لجلسة 15 يوليو لنفس السبب.

 

أحكام

  • يوم 27 يونيو اتنفذ حكم الإعدام في الليبي عبد الرحيم المسماري واللي كان متهم رئيسي في حادثة الوحات اللي حصلت يوم 20 أكتوبر 2017 ومات فيها 16 من أفراد الشرطة. وفي نفس اليوم، محكمة القضاء الإداري حكمت بعدم قبول دعوى كانت مقامة من مؤسسة حرية الفكر والتعبير مُوكله من حسن البنا مبارك كانت بتطالب بإلزام قطاع مصلحة السجون بالسماح لأهل حسن البنا بدخول المستلزمات الصحية وأدوات النظافة الصحية زي المطهرات والكحول والكمامات.

  • يوم 28 يونيو المحكمة الاقتصادية حكمت علي سما المصري بالسجن 3 سنين والمراقبة لمدة 3 سنين تانيين وغرامة 300 ألف جنيه، بسبب اتهامها ب ” التحريض على الفجور”.

  • يوم 30 يونيو محكمة جنح القاهرة الاقتصادية حددت يوم 27 يوليو عشان تنطق بالحكم على صناع المحتوى مودة الأدهم وحنين حسام و3 تانيين، بعد ما كانت قبضت عليهم في أبريل اللي فات واتهمتهم بـ ” الاعتداء على المبادئ والقيم الأسرية في المجتمع المصري”.

  • يوم 1 يوليو محكمة النقض أيدت حكم نهائي بالإعدام على الراهب أشعياء المقاري وخففت حكم إعدام الراهب فلتاؤس المقاري لمؤبد واللي كانوا  متهمين بقتل الأنبا أبيفانيوس أسقف دير مقار في شهر يوليو 2018. وهو نفس اليوم اللى أيدت فيه النقض حكم الإعدام على ثلاث متهمين في القضية المعروفة بأنصار الشريعة والسجن المؤبد لأربعة تانيين، وخففت السجن المشدد ١٥ سنة إلي ١٠ سنوات على ثلاث متهمين آخرين.

  • يوم 2 يوليو محكمة النقض خففت الحكم الصادر على الضابط ياسين حاتم صلاح واللي كان متهم بقتل الناشطة شيماء الصباغ يوم 24 يناير 2015  من 10 سنوات ل7 سنوات.

Leave A Reply