من ١-٨ أغسطس: نشرة الجبهة المصرية الأسبوعية حول أوضاع النيابات والمحاكم

أهلًا بيكم، فريق الجبهة بيجمع كل اللي يقدر يوصل له طول الأسبوع، عن إيه اللي حصل في المحاكم والنيابات، ويتابع أحوال الناس اللي بيتقبض عليها ويشوف ليه وإزاي اتقبض عليهم، وده خلال الفترة من 1 أغسطس وحتى 8 أغسطس

النيابة:

  • يوم  5 أغسطس ظهر محمد حامد قدام نيابة أمن الدولة، بعد ما اختفى قسريًا لمدة 8 أيام، واتحقق معاه على ذمة القضية 810 حصر أمن دولة لسنة 2019

  • في نفس اليوم نيابة طنطا أخلت سبيل منار سامي بعد ما دفعت 20 ألف جنيه كفالة لوقف تنفيذ الحكم الصادر عليها بالحبس 3 سنين، منار اتحاكمت قدمان المحكمة الاقتصادية بسبب إدانتها بالتعدي على “قيم ومبادئ الأسرة المصرية”،  والمفروض إن جلسة الاساتئناف على الحكم هتكون يوم 15 أغسطس.

  • يوم 5 أغسطس، النائب العام أمر بالتحقيق في “شكوى التعدي على فتاة جنسيًا بفندق فيرمونت نايل سيتي في القاهرة، وده بعد ما المجلس القومي للمرأة بعت لمكتب النائب العام بخصوص الشكوى اللي قدمتها بنت للمجلس بتقول فيها إنها تعرضت للاغتصاب من أكتر من شخص. الأخبار المتداولة على السوشيال ميديا بتقول إن المتهمين أبناء شخصيات معروفة في مصر، ورغم إن البنت أرفقت بشكواها عدد من الشهادات لناس عندهم معلومات عن القضية إلا إن لحد دلوقت النيابة ما أصدرتش أي أوامر ضبط وإحضار لأي حد. 

  • يوم 8 أغسطس اتفاجئ أهل محمد القصاص، بتدويره وعرضه على نيابة أمن الدولة على ذمة قضية تالتة  واتعرض على  ذمة القضية رقم 786 لسنة 2020، بنفس التهم اللي اتوجهت له في القضية  رقم 1781  لسنة 2019، واللي محكمة الجنايات أخلت سبيله على ذمته من 3 أيام بس. نائب رئيس حزب مصر القوية محبوس من 3 سنين تقريبًا، ورغم صدور قرارات بإخلاء سبيله إلا إن القرارات دي ما بيتمش تنفيذها عشان، النيابة بترجع تتهمه بنفس الاتهامات على ذمة قضايا جديدة.

الجنايات:

  • يوم 5 أغسطس انعقدت الدائرة الأولى جنايات برئاسة المستشار حسين السايس لنظر أمر تجديد حبس ٦٤ متهم على ذمة ١٠ قضايا. وقررت الدائرة إخلاء سبيل محمد القصاص نائب رئيس حزب مصر القوية ومعاه 17 متهم تانيين، واستمرار حبس باقي المتهمين 45 يوم. ورغم إن محصلش استئناف من النيابة على إخلاء سبيل القصاص إلا إنه فضل محبوس وتم تدويره على ذمة قضية جديدة. 

  • يوم 6 أغسطس انعقدت الدائرة التانية برئاسة المستشار معتز خفاجي لنظر أمر تجديد حبس ٢٣٤ متهم على ذمة ٩ قضايا، ولحد دلوقت قرار الدائرة مش معروف رغم مرور يومين على انعقاد الجلسة، وبكده يكون المتهمين محبوسين أكتر من 45 يوم من غير تجديد حبسهم أو إخلاء سبيلهم، وده وضع نقدر نقول عليه مش قانوني.

  • يوم 6 أغسطس قررت الدائرة الأولى جنايات برئاسة المستشار حسن السايس إخلاء سبيل خالد عزب مدير قسم المشروعات بمكتبة الإسكندرية، وعماد فتحي، عضو حزب التحالف الشعبي الاشتراكي بالإسكندرية، بتدابير احترازية في القضية رقم 1956 لسنة 2019 حصر أمن دولة عليا والمتهمين فيها بالانضمام لجماعة إرهابية، ونشر وإذاعة أخبار وبيانات كاذبة، وإساءة استخدام وسائل التواصل الاجتماعي.، خالد عزب اتحبس سنة و 3 شهور،بعد ما  اتقبض عليه في أبريل 2019. النيابة ما استأنفتش على القرار، ولو حصل وخرج خالد عزب فعلًا والنيابة ما قررتش “تدويره” على ذمة قضية جديدة زي ما حصل معاه في فبراير 2020. يبقى المفروض يروح قسم الشرطة يومين في الأسبوع. 

  • يوم 8 أغسطس، قررت محكمة جنايات المنصورة إنها تجدد حبس الناشط محمد عادل لمدة 45 يوم على ذمة القضية 5606 لسنة 2018 إداري أجا، ورغم إن عادل محبوس من أكتر من سنتين وشهرين بمخالفة القانون اللي بقول إن الحد الٌأقصى للحبس الاحتياطي سنتين، لكن المحكمة ما اهتمتش وأصرت على مخالفة  المادة 143 من قانون الإجراءات الجنائية، مش كده وبس محكمة جنايات المنصورة تجاهلت سوء أوضاع احتجاز عادل المثبتة في الأوراق الرسمية.

محاكم:

  • يوم 6 أغسطس رئيس هيئة النيابة الإدارية أحال دكتور بيشتغل  وحدة كوم الصعايدة في جرجا (سوهاج) للمحاكمة التأديبية، وده بعد ما الدكتور ده عمل عملية ختان لطفلة ماكملتش 12 سنة، واتسبب لها في عاهة مستديمة.

  • في نفس اليوم قررت محكمة جنح القاهرة الجديدة، إنها تأجل إعادة محاكمة هشام جنينة الرئيس السابق للجهاز المركزي للمحاسبات، والمحبوس من أكتر من سنتين، محكمة النقض كانت لغت الحكم على هشام جنينة بخمس سنين حبس، بعد اتهامه في القضية المعروفة باسم التصريحات المسيئة للدولة، والمفروض إن جلسة إعادة المحاكمة هتكون يوم 27 أغسطس.

ضع ردا