من يوم 10 يوليو حتى 17 يوليو 2020

أهلًا بيكم، فريق الجبهة بيجمع كل اللي يقدر يوصل له طول الأسبوع، عن إيه اللي حصل في المحاكم والنيابات، ويتابع أحوال الناس اللي بيتقبض عليها ويشوف ليه وإزاي اتقبض عليهم.

النيابة العامة (تحقيقات وجلسات تجديد الحبس وبيانات) :

  • يوم 11 يوليو قوات الأمن قبضت علي محمد هاشم مالك دار”ميريت” وحققت معاه النيابة على ذمة القضية  رقم 2079 لسنة 2020، إداري عابدين بتهمة التحرش بسيدة في 2019، وأخلت سبيله بكفالة 5 آلاف جنية بعدها يوم .

  • وفي نفس اليوم تم التحقيق مع عبد الرحمن نوار محمد بدر – 22 سنة  – طالب بكلية الحاسبات ونظم المعلومات،  وظهر عبد الرحمن قدام النيابة على  ذمة القضية 750 لسنة 2019  حصر أمن دولة علي، وده بعد ما اختفى 63 يوم  فى مقر الأمن الوطنى بالمنوفية  بعد القبض عليه من بيته فى 29 مايو 2020، والنيابة اتهمته بالانضمام لجماعة  إرهابية.

  • أما هدى خليل ربيع عيد – 30 سنة – ربة منزل، ظهرت أخيرًا بعد اختفاء قسري استمر 62 يوم فى قسم أول العريش ومقر الأمن الوطني بالعريش. النيابة حققت مع هدى على ذمة القضية 810 لسنة 2019 حصر أمن دولة واتهمتها بالانضمام لجماعة إرهابية 

  • ويوم 12 يوليو، قررت النيابة حبس صلاح الدين محمد علي حماد، مدير عام مساعد في إدارة الاسكندرية للبترول 15 يوم على ذمة القضية 1360 لسنة 2019 أمن دولة، بعد ما اختفى قسرياً لمدة 14 يوم قضاهم في مقر الأمن الوطني بأبيس.

  • وفي نفس اليوم تم التحقيق مع الطبيب البيطري والمدافع عن حقوق المختفين قسريًا  د. أحمد شوقى عماشة – 58  سنة – على ذمة القضية 1360 لسنة 2019 ، د. أحمد عماشة اختفى قسريًا فى مقر الأمن الوطنى بالعباسية بعد القبض عليه من بيته فى 17 يونيو والنيابة اتهمته  بالانضمام إلى جماعة إرهابية وإذاعة ونشر أخبار كاذبة.

  • وفى نفس اليوم وعلى ذمة نفس القضية تم التحقيق مع دكتور عطية السيد فياض أستاذ بكلية الشريعة والقانون جامعة الأزهر وده بعد ظهوره قدام النيابة، بعد 25 يوم اختفاء قسري فى قسم الشروق و مقر الأمن الوطنى بالعباسية  بعد القبض عليه من بيته  فى 16 يونيو، النيابة اتهمت الدكتور عطية فياض  بالانضمام إلى جماعة إرهابية ونشر وإذاعة أخبار كاذبة .

  • 13 يوليو ظهر قدام نيابة أمن الدولة العليا مطور المواقع مصطفى جمال، مصطفى كان محبوس على ذمة القضية 480 لسنة 2018 لمدة سنتين واربع شهور، وبعد ما أخلي سبيله في اول شهر سبتمر اللي فات، واختفي قسريا من الوقت ده في مقر الأمن الوطنى بالشيخ زايد وبعدين تم تدويره على ذمة قضية تانية رقمها 730 لسنة 2020. 

  • في نفس اليوم تم التحقيق مع محمد أحمد عبد الغنى حسانين – 66 سنة-  طبيب بالمعاش على ذمة القضية 1360 لسنة 2019، د. محمد كان مختفي قسريًا لمدة 3 شهور و 18 يوم فى مقر الأمن الوطنى بمنطقة بلبيس، د. محمد كان تم إخلاء سبيله قبل كده  على ذمة القضية 145 لسنة 2017 حصر أمن دولة عليا،  واتهمته النيابة بقيادة جماعة إرهابية وتمويلها ونشر و إذاعة أخبار كاذبة .

  • ويوم 14 يوليو ظهرت المهندسة ” ريمان الحساني” قدام نيابة أمن الدولة واتحقق معاها على ذمة القضية 730 لسنة 2929 واتهمتها النيابة بالإنضمام لجماعة إرهابية ونشر أخبار كاذبة وإساءة استخدام وسائل التواصل الاجتماعي، بعد ما اختفت قسريا لمدة 28 قضتهم في مقر الأمن الوطنى بالشيخ زايد، وده حصل بعد إخلاء سبيلها من القضية 817 لسنة 2018 بعد حبسها لمدة سنتين

  • وفى نفس اليوم تم تدوير أحمد محمد حسن عبد الرحمن – 36 سنة –  على نفس القضية، وده بعد ما اتحكم له بالبراءة فى القضية 64 عسكرية، واللي اتحبس على ذمتها 3 سنين ونص. وبعد حصوله على البراءة اتنقل لمركز شرطة الفيوم لتنفيذ إجراءات إخلاء سبيله، لكنه ماخرجش وفضل فى القسم، واتعرض على نيابة أمن الدولة اللي اتهمته بالانضمام لجماعة إرهابية وترويج لنشاط الجماعة .

الجنايات 

  • يوم 12 يوليو انعقدت الدائرة الخامسة برئاسة المستشار محمد سعيد الشربينى  للنظر في أمر مد الحبس الاحتياطى لـ 167 متهم محبوسين على ذمة 12 قضية وبعد سماع مرافعة الدفاع، وفي غياب المتهمين اللي فضلوا في أماكن احتجازهم، قررت الدائرة حبس الكل 45 يوم. وانعقدت نفس الدائرة يوم 13 يوليو للنظر فى أمر مد الحبس الاحتياطى لـ 316 متهم محبوسن على ذمة 29 قضية وزي كل مرة المتهمين مكانوش موجودين والدائرة بعد ما سمعت مرافعات الدفاع قررت تحبس الكل 45 يوم.

  • نفس الدائرة انعقدت تاني يوم 14 يوليو للنظر فى أمر مد الحبس الاحتياطى لـ 191 متهم محبوسين على ذمة 40 قضية وقررت الدائرة بردو استمرار حبس الكل 45 يوم. وفي نفس اليوم  تم تجديد حبس الدكتور عبد المنعم أبو الفتوح 45 يوم جديدة على ذمة القضية 488 لسنة 2018.

  • أما الدائرة 5 ( أ ) برئاسة المستشار عصام ابو العلا انعقدت عشان تنظر أمر مد الحبس الاحتياطى لـ 433 متهم محبوسين على ذمة 32 قضية وكان قرار الدائرة هو تأجيل 12 قضية لمدة أسبوع واستمرار حبس باقى المتهمين على ذمة 20 قضية لمدة 45 يوم.

  • 15 يوم  يوليو محكمة جنايات الإسكندرية أخلت سبيل 19 واحد على ذمة القضية 1413 لسنة 2019 ودي قضية من القضايا اللي اتعملت وقت مظاهرات سبتمبر 2019 واللي كانت خرجت ضد الرئيس السيسي ونادت برحيله.

 أحكام 

  • يوم 11 يوليو محكمة النقض أيدت حكم بالسجن 20 سنة علي محمود مكاوي، والمتهم في أحداث الاتحادية اللي حصلت في ديسمبر 2012 وراح ضحيتها الصحفي الحسيني أبو ضيف. 

  • يوم 14 يوليو أيدت محكمة النقض بشكل نهائي حكم المؤبد ضد مرشد جماعة الإخوان محمد بديع وآخرين في القضية المعروفة إعلاميًا بأحداث العدوة بمحافظة المنيا لسنة 2013. وفي نفس اليوم أيدت محكمة النقض بشكل نهائي براءة وزير الداخلية السابق اللواء حبيب العادلي وتغريمه 500 جنيه، وده بعد اتهامه بالاستيلاء على أكثر من 2 مليار جنيه من أموال وزارة الداخلية.

ضع ردا