أهلًا بيكم، فريق الجبهة بيجمع كل اللي يقدر يوصل له طول الأسبوع، عن إيه اللي حصل في المحاكم والنيابات، ويتابع أحوال الناس اللي بيتقبض عليها ويشوف ليه وإزاي اتقبض عليهم، وده خلال الفترة من 25 يوليو وحتى 31 يوليو
النيابة :
- يوم 25 يوليو، ظهر 3 أشخاص واتحقق معاهم على ذمة القضية 773 لسنة 2020، محمد أحمد شحاته اتقبض عليه من بيته يوم 20 يوليو، وفضل مختفي قسريًا بعدها لحد ما اتحقق معاه، النيابة حققت كمان مع هشام متولى على حسن الشوبكي بعد ما اتقبض عليه من بيته يوم 21 يوليو، وفضل مختفي لحد ما تعرض على النيابة، .أما إسلام علوانى حجازى اتقبض عليه من بيته يوم 14 يوليو وفضل مختفي حوالي 10 أيام . النيابة اتهمت التلاتة بالانضمام لجماعة إرهابية إذاعة ونشر أخبار كاذبة. الغريب في الموضوع، واللي نقدر نعتبره مش قانوني، هو إن منصة اليوم السابع الإخبارية نشرت فيديو ظهر فيه محمد وهشام وإسلام ومعاهم تلانة تانيين، بيعترفوا فيه بالتهم اللي وجهتها لهم النيابة، قبل حتى ما يتحقق معاهم بيومين كاملين.
- يوم 26 يوليو، ظهر عبد الرحمن محمد على حسين بعد اختفاء قسري استمر 35 يوم، واتعرض على النيابة اللي حققت معاه على ذمة القضية 810 لسنة 2019 بتهمة الانضمام لجماعة إرهابية. اللي حصل لعبد الرحمن هو تدوير زي ما حصل مع كتير غير الفترة اللي فاتت، لأنه بعد ما نيابة أمن الدولة أخلت سبيله يوم 15 يونيو 2020 على ذمة القضية 570 لسنة 2018 ما خرجش، لكنه اتنقل لمحافظة المنيا لتنفيذ القرار، وبعدها اتنقل يوم 19 يونيو لمقر الأمن الوطني في قنا وفضل هناك لحد ما اتعرض على النيابة على ذمة القضية الجديدة.
- في نفس اليوم أحالت النيابة العامة المتهمين بالتعدي على فتاة التيك توك منة عبد العزيز عشان يتحاكموا قدام محكمة جنايات، المتهمين عددهم 6 (4 أولاد وبنتين)، واتهاماتهم حسب بيان النيابة العامة هي: “هتك عرضها بالقوة والتهديد، وسرقتها بالإكراه، وانتهاك حرمة حياتها الخاصة عبر شبكة المعلومات الدولية، وضربها، وإتلاف هاتفها، وتهديدها بإفشاء أمور مخدشة بشرفها، وتعاطي المخدرات، وإدارة وتهيئة مكان لذلك”. ورغم كده منة عبد العزيز لسه متهمة في قضية تانية لأنها حسب النيابة “بتهدد قيم الأسرة المصرية” زيها زي باقي بنات وستات التيك توك، ولسه برضه مش في بيتها لأن النائب العام أمر الشهر اللي فات بإيداعها في مركز تأهيل.
- يوم 28 يوليو، وبعد اختفاء قسري لمدة 75 يوم، ظهر عبد الحميد غريبي محمد (53 سنة) اللي اتقبض عليه من بيته يوم 10 مايو 2020، واتحقق معاه على ذمة القضية 786 لسنة 2020، والنيابة اتهمته بالانضمام لجماعة إرهابية.
الجنايات :
- يوم 25 يوليو، انعقدت الدائرة 5 ب جنايات برئاسة المستشار محمد سعيد الشربينى لنظر أمر مد الحبس الاحتياطى لـ 210 متهم محبوسين على ذمة 29 قضية ، وقررت الدائرة استمرار حبس كل المتهمين المعروضين لمدة 45 يوم.
- يوم 26 يوليو، انعقدت نفس الدائرة لنظر أمر مد حبس 210 متهم على ذمة 32 قضية، وبردو كان القرار استمرار حبس كل المتهمين المعروضين لمدة 45 يوم.
- يوم 27 يوليو الدائرة 5 ب جنايات انعقدت برئاسة المستشار وجدى عبد المنعم لنظر أمر مد حبس 504 متهم محبوسين على ذمة 40 قضية، والدائرة قررت إخلاء سبيل المحامية سحر علي وحبس باقى المتهمين 45 يوم.
- يوم 28 يوليو، انعقدت نفس الدائرة لنظر أمر مد حبس 79 متهم على ذمة 14 قضية، وكان القرار استمرار حبسهم كلهم لمدة 45 يوم.
أحكام
- يوم 25 يوليو حكمت محكمة جنح أمن الدولة طوارئ أبو كبير، بحبس عمر محمود الحوت لمدة شهرين وتغريمه 500 جنيه، في القضية رقم 154 لسنة 2020 حصر تحقيق وده بعد ما تمت إدانته بحيازة منشورات تروج لأفكار إرهاب.
- يوم 27 يوليو، حكمت المحكمة الاقتصادية على حنين حسام ومودة الأدهم بالحبس سنتين، وغرامة 300 ألف جنيه بعدما تمت إدانتهن بالتعدي على “قيم ومبادئ الأسرة المصرية”، والمحكمة حددت يوم 17 أغسطس الجاي لنظر الاستئناف,
- يوم 29 يوليو، حكمت محكمة طنطا الاقتصادية على منار سامي (المحبوسة بسبب نفس اتهامات حنين ومودة) بالحبس 3 سنوات مع الشغل وكفالة 20 ألف لإيقاف تنفيذ العقوبة، و300 ألف جنيه غرامة، وحددت المحكمة جلسة استئناف منار على الحكم يوم 15 أغسطس الجاي.
- خلال الأسبوع ده ملك الكاشف طعنت على حكم “القضاء الإداري” لتخصيص أماكن احتجاز داخل السجون للعابرين جنسيًا، وده بعد ما محكمة القضاء الإداري حكمت بعدم قبول الدعوى اللي رفعتها ملك “لزوال المصلحة” يوم 30 مايو اللي فات.
سجون وتنفيذ أحكام
- عرفنا الأسبوع ده إن المحتجزين في سجن المنصورة بدأوا إضراب عن استلام التعيين، وده للتعبير عن احتجاجهم على التكدس الشديد وسوء المعاملة، المحتجزين بيهددوا بالتصعيد إلى إضراب جزئي وبعدين كلي عن الطعام، لو فضلت الإدارة تتجاهل مطالبهم. فوق كل ده في أنباء إن إدارة السجن نزلت عدد من المحتجزين للتأديب من أكتر من شهر وزمايلهم مايعرفوش عنهم حاجة.
- يوم 28 يوليو مصلحة السجون في الإسماعيلية نفذت حكم المحكمة وأعدمت 7 أفراد كانت المحكمة أدانتهم بقتل نقيب شرطة في نوفمبر 2013، على ذمة القضية رقم 2044 لسنة 2013 جنايات كلي الإسماعيلية/ 6771 لسنة 2013، جنايات ثالث الإسماعيلية. تقرير الطب الشرعي أكد قبل كده إن المتهمين السبعة اتعرضوا لتعذيب واضح في كل حته في جسمهم، لكن المحكمة أصرت على الحكم بالإعدام وما اهتمتش بتقرير الطب الشرعي.